Regulation 738-2 - Pashto

په وروستی ځل د کتلو نیټه: ۱۷ فبروری، ۲۰۲۶

زده کوونکي

ٹائٹل IX – تعلیمي پروګرامونو او فعالیتونو ته یو برابر لاسرسي

موخه: د ۱۹۷۲ کال د تعلیمي تعدیلاتو د ټایٔټل IX او د ښوونځي بورډ د ۷۳۸ پالیسۍ، "د زده کوونکو پر ضد د تبعیض او ځورونې نه کول،" سره سم، د پرنس ویلیم کاونټي عامه ښوونځیو (PWCS) زده کوونکي باید د جنسیت پر بنسټ په کوم ټولګي، پروګرام یا فعالیت کې د شاملیدو له حق څخه محروم نه شي. په دې کې تدریسي، روغتیایي، بدني روزنه، صنعتي، سوداګریز، حرفوي، تخنیکي، د کور اقتصاد، موسیقي، او د بالغو کسانو د زده کړې پروګرامونه شامل دي. هغه کسان چې غواړي داسې کوم راپور ثبت کړي چې یو زده کوونکی تعلیمي پروګرام یا فعالیت ته د لاسرسي په برخه کې د جنسیت پر بنسټ له تبعیض سره مخ شوی وي، کولی شي د شکایت ثبتولو لپاره په دې مقرره کې د شکایت له طرزالعملونو څخه ګټه پورته کړي. د ښوونځي ډیویژن نیت دا دی چې د جنسیت پر بنسټ د تبعیض ټول شکایتونه په چټکۍ او عادلانه توګه حل کړي.

هغه کسان چې غواړي د جنسي ځورونې او/یا نورو جنسي ناوړه کړنو په اړه، کوم چې د ټایٔټل IX تر پوښښ لاندې راځي، شکایت ثبت کړي یا راپور ورکړي، باید د ښوونځي بورډ د ۱-۷۳۸ مقرری "د زده کوونکو په وړاندې د جنسي ناوړه چلند د ادعاوو حل" کې ټاکل شوی کړنلارې تعقیب کړی.

1. تعریفونه
   1. "کاري ورځ" د هر هغی رسمی ورځی په معنی ده چې د PWCS اداري دفترونه پکی پرانیستي وي.
   2. "تعلیمي پروګرام یا فعالیت": د دې مقررې د موخو لپاره، په دی کې د PWCS هغه ټول اکاډمیک، غیر نصابي فعالیتونه، ورزشي لوبې او نور هغه پروګرامونه شامل دي چې د PWCS د "اکاډمیکو او پروګرامونو" په ویب پاڼه کې په ډاګه شوي، او همدارنګه هغه ځایونه، اسانتیاوې، پیښې، یا نور فعالیتونه چې PWCS پرې د پام وړ کنټرول لري.
   3. "د جنسیت پر بنسټ تبغیض" پدې معنی دی چې د جنسیت، امیندوارۍ، ماشوم زیږون، یا اړوندو حالتونو په شمول د شیدو ورکولو، یا له هغو څخه د رغیدو، جنسي بڼی، جنسي تمایل، یا جنسیتي هویت په اساس تبعیض تر سره شي.
   4. "د ټایٔټل IX تبعیض" د دې مقررې په چوکاټ کې هغه وخت رامینځته کیږي کله چې یو څوک د خپل جنسیت له امله په تعلیمي پروګرامونو یا د ښوونځي په فعالیتونو کې د ګډون له مساوي فرصتونو څخه بې برخې شي، یا ورته د لاسرسي اجازه ورنکړل شي، او یا هم په بل ډول د PWCS له تعلیمي ګټو څخه محروم کړل شي.
2. د جنسیت پر بنسټ د توپیر منل شوې بڼې او د یو ډول جنس (نارینه یا ښځینه) تعلیمي پروګرامونه او فعالیتونه:
   
   پرته له هغه حالاتو چې په دې برخه کې ورته اشاره شوې، د هر جنس زده کوونکو ته باید تعلیمي پروګرامونو یا فعالیتونو ته د لاسرسي غیر تبعیضي او مساوي فرصتونه ورکړل شي، چې د ښوونځي د شاملیدو د معلوماتو له فیصدي سره برابر یا نږدې وي. د یو ډول جنس، یا په غالب ډول د یو ډول جنس لرونکو تعلیمي پروګرامونو او فعالیتونو څخه د مخنیوي لپاره باید هڅې تر سره شي، پرته له دی چی د لاندی ذکر شوي برخې له مخی اجازه ورکړل شوې وي یا د لاندې تشریح شويو ټکو سره سم ترسره شي.
   1. د یو ډول جنس یا جنډر، یا په غالب ډول، جنسی تعلیمي پروګرامونه او فعالیتونه
      
      لاندې تعلیمي پروګرامونه او فعالیتونه کیدای شي د PWCS په ښوونځیو کې د دې مقررې د دویمې (۲) برخې د "B" بند له اړتیاوو سره له مطابقت لرلو پرته وړاندې شي .
      1. د غږیزې موسیقۍ د ټولګیو جوړښت د غږ د اندازې یا کیفیت پر بنسټ د اړتیاوو له مخې ټاکل کیدی شي، حتی که دا ډول اړتیاوې د یو ډول جنس یا په غالب ډول د یو جنس لرونکي ډلی د رامنځته کیدو لامل کیږي.
      2. هغه ټولګي یا د ټولګیو برخې چې په ځانګړې توګه د انسان له جنسیت سره تړاو لري، کیدای شي د هلکانو او نجونو لپاره په جلا ناستو کې ترسره شي. په هیڅ درسي مضمون کې باید د جنسیت پر بنسټ جلا شوې دندې، توکي، خدمات یا اړتیاوې شتون ونلري، پرته له هغه مواردو چې د کورني ژوند زده کړو په پروګرام کې ذکر شوي دي.
      3. د فیزیکی یا بدني روزنې په ټولګیو او فعالیتونو کې، زده کوونکي د وړتیا له مخې ګروپ بندي کیدی شي، او د دوی مهارتونه او پرمختګ د انفرادي فعالیت د عیني معیارونو پر بنسټ اندازه کیدی شي چې پرته له جنسیتي توپیر څخه رامینځته شوي او پلي کیږي.
      4. د فیزیکی یا بدنی روزنې په ټولګیو او فعالیتونو کې، زده کوونکي د غیږ نیونې یا ریسلنګ، سوک وهنې، رګبي، د یخ یا آیس هاکۍ، فوټبال، باسکیټبال او نورو هغه لوبو کې د ګډون پر مهال د جنسیت له مخې جلا کیدی شي چې موخه یا اصلي فعالیت یې فزیکي ټکر وي.
   2. د یو ډول جنس تعلیمي پروګرامونو او فعالیتونو لپاره شرایٔط
      
      پرته له هغه مواردو چې د دې مقررې د دویمې (۲) برخې په "A" بند کې راغلي، د PWCS ښوونځي باید د یو جنس لرونکي ټولګي یا غیر نصابي فعالیت وړاندې کولو لپاره د دې برخې ټولې اړتیاوې یا شرایٔط پوره کړي. د دې برخې د اړتیاوو یا شرایٔطو نه پوره کول کیدای شي د ټولګي یا غیر نصابي فعالیت د بندیدو لامل شي.
      1. د PWCS ښوونځي کولی شي یوازی یو جنس لرونکي ټولګي او غیر نصابي فعالیتونه وړاندې کړي که چیرې لاندې پنځه اړتیاوې یا شرایٔط پوره شي:
         1. یو ډول جنس لرونکی هر ټولګی یا فعالیت باید پر یوې مهمې موخې ولاړ وي ترڅو ۱) د متنوع تعلیمي فرصتونو وړاندی کولو لپاره د PWCS د جوړی شویو عمومي پالیسیو له لارې د زده کوونکو تعلیمي لاسته راوړنې ښه کړي، یا ۲) د زده کوونکو ځانګړې او پیژندل شوې تعلیمي اړتیاوې پوره کړي.
         2. د ټولګي یا د غیر نصابي فعالیت "یو ډول جنس لرونکی" بڼه باید په بنسټیزه توګه د هغې مهمې تعلیمي موخې له ترلاسه کولو سره تړاو ولري.
         3. ښوونځی باید خپله مهمه تعلیمي موخه په عادلانه او مساوي ډول پلي کړي، کوم چې ښایي ښوونځی اړ کړي چې د پاتې جنس زده کوونکو لپاره هم ورته (په بنسټیزه توګه مساوي) یو جنس لرونکی ټولګی یا غیر نصابي فعالیت برابر کړي.
         4. په یو ډول جنس لرونکي ټولګي یا غیر نصابي فعالیت کې د زده کوونکي شمولیت باید په بشپړ ډول داوطلبانه (اختیاري) وي.
         5. ښوونځی باید نورو ټولو زده کوونکو ته، په شمول د هغه جنس زده کوونکي چې له یاد فعالیت څخه ایستل شوي وي، په ورته مضمون یا فعالیت کې یو مساوي ګډ (مختلط) یا یو جنس لرونکی ټولګی یا غیر نصابي فعالیت وړاندی کړي.
      2. هغه ښوونځي چې دواړو جنسو ته یو برابر یو ډول جنس لرونکی ټولګی یا غیر نصابي فعالیت وړاندې کوي، باید دغه ټولګی یا فعالیت تر ډیره حده په مساوي ډول وړاندی کړي. د دې لپاره چې فعالیتونه تر ډیره حده مساوي وي، ښوونځي باید ټولګي یا فعالیتونه د ذکر شویو فکتورونو له لارې پرتله کړي: د شمولیت پالیسۍ او معیارونه؛ هغه تعلیمي ګټې چې وړاندی کیږي، په شمول د تعلیمي نصاب کیفیت، پراختیا او محتوي؛ نور خدمات؛ د کتابونو، درسي توکو او ټکنالوژۍ کیفیت او شتون؛ د ښوونکو او کارمندانو وړتیا؛ جغرافیایي لاسرسی؛ د هغو اسانتیاوو او سرچینو کیفیت، لاسرسی او شتون چې ټولګي ته ورکول کیږي؛ او غیر ملموس (intangible) ځانګړتیاوي، لکه د ښوونکو یا فاکولتی شهرت.
      3. یو ډول جنس لرونکي ټولګي یا غیر نصابي فعالیتونه، او د هر یو تر شا اصلي توجیه باید لږ تر لږه په هرو دوو کلونو کې یو ځل وڅیړل شي ترڅو ډاډ ترلاسه شي چې دوی پر حقیقي توجیهاتو ولاړ دي او د کوم جنس د بیلابیلو استعدادونو، ظرفیتونو یا غوښتنو په اړه په پراخو کلیشه ایزو انګیرنو تکیه نه کوي، او دا چې هر ډول یو جنس لرونکي ټولګي لاهم د پروګرام یا فعالیت د مهمې موخې له ترلاسه کولو سره تر ډیره حده تړاو لري.
   3. د یو ډول جنس لرونکو ټولګیو یا غیر نصابي فعالیتونو لپاره توجیه او شواهد
      1. د هر ډول یو جنس لرونکی ټولګی یا فعالیت پلي کولو دمخه، باید د ښوونی او زده کړې لپاره ایسوسی ایټ سوپرانټینډنټ یا د هغه/هغي استازي ته د تصویب لپاره یوه ځانګړې او انفرادي توجیه وړاندې شي چې د ټولګي د یو جنس لرونکي ماهیت او د هغې د مهمې موخې ترمنځ بنسټیزه اړیکه په ډاګه کړي. هر ټولګی یا فعالیت، یا په هغه ټولګي کې چې ګڼ شمیر مضامین پکی تدریس کیږي هر مضمون، باید له پلي کیدو دمخه په جلا توګه ثابت یا توجیه شي.
      2. د ټولګي د یو جنس لرونکي ماهیت او د ښوونځي د مهمې موخې ترمنځ بنسټیزه اړیکه باید په مستقیم ډول د هغو شواهدو لخوا تائید شي چې راټول شوي او د پلي کیدو دمخه د بیاکتنې لپاره د ښوونی او زده کړې لپاره ایسوسی ایټ سوپرانټینډنټ ته سپارل شوي وي. ښوونځی کولای شی د غور لپاره لاندې شواهد وړاندې کړی:
         1. ښوونځي کولی شي له داسې شواهدو کار واخلي چې ښیي یو ورته (پرتله کېدونکي) ښوونځي د یو ډول جنس لرونکي ټولګي یا فعالیت له لارې خپله مهمه موخه ترلاسه کړې ده. د دې کار تر سره کولو لپاره، ښوونځۍ باید:
            1. هغه پرتله کېدونکي ښوونځي وپیژني چې د زده کوونکو نفوس یا شمیر او د ښوونځي او ټولګي شرایط یې د غوښتونکي ښوونځي له نفوس او شرایطو سره ورته وي؛ (د بیلګی په توګه د زده کړې کچه، درسي مضامین، جغرافیایي موقعیت، د شمولیت شرطونه، تعلیمي ګټې او نور وغیره)
            2. هغه معلومات (ډیټا) ترلاسه کړي چې ښیي دغو مقایسه کېدونکو ښوونځیو په اړوند مضمون کې یا د اړوندې تعلیمي یا ټولنیزې اړتیا په اړه د یو ډول جنس لرونکو ټولګیو په کارولو سره خپله مهمه موخه ترلاسه کړې ده؛ او
            3. د مقایسه کېدونکو ښوونځیو د پیژندلو پر مهال، ښوونځی باید هغه عوامل په پام کې ونیسي چې کیدای شي دوه ښوونځي له یو بل څخه جلا کړي، لکه د زده کوونکو ترمنځ ټولنیز-اقتصادي توپیرونه، د داخلې په پالیسیو او معیارونو کې توپیرونه، یا د خصوصي مالي بودیجی یا تمویل له لارې شته سرچینې.
         2. ښوونځي کولی شي پداسی شرایطو چی د ښوونځی شرایطو ته په کافي اندازه ورته وي، د څیړنیزو شواهدو څخه کار واخلي چې د یو ډول جنس لرونکو ټولګیو اغیزمنتوب ثابتوي. د قناعت وړ څیړنه باید:
            1. د علت او معلول د پایلو د تثبیت لپاره له یوې قوي او دقیقې څېړنیزې طرحې څخه کار واخلئ؛
            2. د بحث لاندې ځانګړې مهمې موخې په اړه د ټولګي د یو ډول جنس لرونکي ماهیت اغیزمنتوب ثابت کړي؛ او
            3. داسې یوه نمونه پکې شامله کړۍ چې د هغه نفوس یا شرایطو سره ورته وي چې غوښتونکی ښوونځی یې په نښه کوي.
   4. حامله زده کوونکي
      1. یوه حامله زده کونکې به د هغې د ډاکټر په سپارښتنه د بدني روزنې او د ښوونځي له نورو فعالیتونو، په شمول د غیر نصابي فعالیتونو څخه عضر وي.
      2. که د حاملې زده کونکې ډاکټر تشخیص کړي چې د حمل پر مهال د هغې د روغتیا او خوندیتوب لپاره طبي او/یا احساساتي لاملونو له امله اړینه ده، نو باید بدیل تعلیمي لارښوونې ورته برابری شي.
3. تعلیمي پروګرامونو او فعالیتونو ته د لاسرسي په برخه کې د جنسیت پر بنسټ د تبعیض ادعاوو د شکایت طرزالعملونه
   
   کله چې ادعا وشي چې یو PWCS زده کوونکی په PWCS تعلیمي پروګرام یا فعالیت کې له ګډون یا لاسرسي څخه بې برخې شوی، دا ادعاوې به د دې مقررې په طرزالعملونو کې د ذکر شویو مادو سره سم حل کیږي.
   
   زده کوونکی، یا هغه مور او پلار چې د زده کوونکي په استازیتوب شکایت ثبتوي، باید د ادعا شوي تبعیض څخه د خبریدو سره سم په سمدستي توګه د ښوونځي اداري مسؤل ته راپور ورکړي. که چیرې شکایت کونکی غواړي داسې شکایت ثبت کړي چې پکې د ښوونځي اداري مسؤل ملامت وي، هغه کولی شي خپل شکایت په مستقیم ډول د "ټایٔټل IX" کوردیناتور ته وړاندې کړي.
   1. د ښوونځي د اداري مسؤل څخه پرته بل هر د PWCS کارکوونکي چې شکایت ترلاسه کوي (که په تحریري بڼه وي او که په شفاهي)، باید شکایت د "ټایٔټل IX" همغږي کونکي یا کوردیناتور ته ورسوي.
   2. د PWCS په تعلیمي پروګرامونو او فعالیتونو کې د احتمالي تبعیض راپورونه په شفاهي یا تحریري بڼه سپارل کیدی شي. هغه کسان چې شکایت ثبتوي، هڅول کیږي چې د دې مقررې سره ضمیمه شوې د شکایت فورمه (ضمیمه ۱) وکاروي، مګر اړ نه دي چی دا کار تر سره کړي.
   3. دا د ښوونځي د اداري مسؤل مسؤلیت دی چې د شکایت ترلاسه کولو وروسته په ۲۴ ساعتونو کې د "ټایٔټل IX" کوردیناتور ته خبر ورکړي، پرته لدې چې بیړني حالتونه د ځنډ لامل شي.
   4. د "ټایٔټل IX" کوردیناتور به ټول راپورونه ارزوي ترڅو معلومه کړي چې ایا ادعا شوي عملونه یا حالتونه، که رښتیا وي، د دې مقررې تر لاندی د "ټایٔټل IX" تبعیض ګڼل کیږي یا نه.
   5. که چیرې ادعا شوي عملونه یا شرایط د دې مقررې له مخې د "ټایٔټل IX" تبعیض په ډاګه کوي، کوردیناتور به سمدلاسه له شکایت کونکي سره اړیکه ونیسي ترڅو د شکایت ثبتولو پروسه ورته تشریح کړي. شکایت کونکي ته به د دې مقررې او د ۱ ضمیمی (تعلیمي پروګرامونو او فعالیتونو ته په مساوي لاسرسي کې د ټایٔټل IX تبعیض شکایت) یوه کاپي ورکړل شي.
   6. په څیړنه کې کیدای شي له شکایت کونکي، شاهدانو، یا نورو هغو کسانو سره مرکې شاملې وي چې د حقایقو او شرایطو په اړه معلومات لري. همدارنګه په دې کې د اسنادو بیاکتنه شامله ده لکه ایمیلونه، د اخیستلو وړاندیزونه، رسیدونه، درسي توکي، مهالویشونه، ویډیوګانې او انځورونه. د اړتیا په صورت کې، د قضیې په اړه له بیلابیلو مدیرانو سره بحث تر سره کیدی شي. د څیړنې معلومات پټ ساتل کیږي، مګر تر هغه حده چې د یوې بشپړې او عادلانه څیړنې ترسره کولو او/یا د قانوني مکلفیتونو د پوره کولو لپاره یی په محدود ډول افشا کول اړین وي. د څیړنې موندنې به د بیاکتنې او پریکړې کولو لپاره د اطاعت او مطابقت رامینځته کولو نظارت کوونکي ته وسپارل شي. د نظارت کوونکی له وروستۍ پریکړې وروسته، څیړنه به بشپړه ګڼل کیږي.
   7. د څیړنې له بشپړیدو وروسته په ۱۰ کاري ورځو کې، د څیړنې یو راپور چې د اړوندو شواهدو لنډیز وړاندې کوي، باید د "ټایٔټل IX" کوردیناتور ته واستول شي. د "ټایٔټل IX" کوردیناتور به د څیړنې راپور ترلاسه کولو وروسته په ۱۰ تقویمي ورځو کې شکایت کونکي ته د حل لاری یو لیک وړاندې کړي چې پکې به ښودل شوي وي چې ایا د "ټایٔټل IX" سرغړونې ادعا ثابته شوې یا نه، او دا چی کوم اصلاحي ګامونه اخیستل شوي یا به واخیستل شي. د زده کوونکو د فعالیتونو د مدیریت رییس او د اجراییوي کابینې غړی به هم د دې لیکلي خبرتیا یوه کاپي ترلاسه کړي.
4. د استیناف کړنلاری یا طرزالعمل
   1. که چیرې د شکایت له حل لاری سره مخالفت شتون ولري، نو د حل لاری د لیک ترلاسه کولو وروسته د څیړنې د موندنو او اصلاحي اقداماتو په اړه د استیناف غوښتنه په پنځو کاري ورځو کی دننه د عدالت او مساواتو عمومي ریٔیس یا د هغه/هغی استازي ته سپارل کیدی شي. هغه کسان چې د استیناف غوښتنه کوي، هڅول کیږي چې د دې مقررې سره ضمیمه شوې د استیناف فورمه (۱۱ ضمیمه) وکاروي، مګر اړ نه دي چی دا کار تر سره کړي.
   2. د عدالت او مساواتو عمومي ریٔیس کولی شي د اړوندې اجراییوي کابینې غړي او د "ټایٔټل IX" کوردیناتور سره له مشورې وروسته نوره څیړنه ترسره کړي، او د استیناف ترلاسه کولو یا د نورې څیړنې بشپړولو په ۱۰ کاري ورځو کې به دواړو خواوو ته لیکلي پریکړه وړاندې کړي.
   3. که چیرې د عدالت او مساواتو عمومي ریٔیس تشخیص کړي چې د استیناف څیړلو لپاره له ۱۰ کاري ورځو څخه ډیر وخت ته اړتیا ده، نو شکایت کونکي ته به د ځنډ لامل او د څیړنې د پای نیټی په اړه خبر ورکړل شي.
   4. د مساواتو رئیس (یا د هغه/هغي استازی) به د اپیل خواوو ته د اپیل د ترلاسه کولو یا د هر ډول اضافی پلټنې د پای ته رسېدو څخه د ۱۰ کاری ورځو دننه لیکلی پرېکړه ورکړی. د عدالت او مساواتو عمومي ریٔیس یا د هغه/هغی د استازی پریکړه به حتمی وي.
5. د ریکارډ یا اسنادو ساتل
   1. د "ټایٔټل IX" کوردیناتور به د ټولو راپورونو، مسؤلیتونو د ټاکلو، حل لارو، او د "ټایٔټل IX" تبعیض د جریمو ریکارډ لږ تر لږه د اوو کلونو لپاره ساتی ترڅو په PWCS کې د دا ډول کړنو د مخنیوي او څارنې په هڅو کې مرسته وکړي.

د مساواتو د برابرولو څانګی عمومی مشر (یا د هغه استازی) د دې مقرری د پلي کولو او ورڅخه د نظارت کولو مسؤلیت په غاړه لري.

دا مقرره او اړونده پالیسي باید لږ تر لږه په هرو پنځو کلونو کې بیاځلی وکتل شي او د اړتیا په صورت کې پکی بدلون رامنځ ته شي.

مقرره ۲-۷۳۸ - ۱ ضمیمه                          مقرره ۲-۷۳۸ - ۲ ضمیمه